原创沈嘉禄海上梦叠
作者：沈嘉禄
沪语改写：周红缨
文字修正：丁迪蒙
诵读：孙蕾
现在有交关江南个古镇侪有粽子卖，青浦朱家角个咸蛋黄肉粽伊拉个拳头产品，沿街设摊、叫卖个起码有三四十家。肉粽里加栗子也是勿错个创意。北大街有个姓葛个老太，出品个肉粽最好。
新场古镇也有家粽子出品勿错，大肉粽卖得比其他地方便宜，迭两年是否涨价勿晓得。印象当中，伊拉个五花肉连皮带肉，肥瘦相兼，老大一块塞勒米里向，稻草绳扎得紧，现烧现卖。
新场古镇金山枫泾三桥景区有家清风阁茶楼，但伊名声在外个是店里供应个阿兴粽子。茶楼主人叫潘兴，开茶楼是本行，但是为了扩大生意，就卖粽子了。阿兴比同行做得好，选用枫泾猪肉，加大分量，实实足足两大块，估计有二两重——师傅勒街面浪包粽子大家侪看得见个，好吃。阿兴还推出排骨粽、咸蛋黄肉粽咾啥，拌料相当讲究，酱油搭糖、黄酒侪有比例，迭个是秘方，勿可外泄个。然后，大镬子烧三个钟头，火候控制邪气得法，解开粽箬，香气扑鼻，一口咬下去，鲜香适口，肥而勿腻，勿柴勿梗。糯米吸收了猪肉个卤汁搭粽箬个清香，每一粒侪像珍珠一样个透明，侪有甘甜个回味。消费者心里有杆秤，称阿兴为“粽子大王”。生意好个辰光，每日天要买脱一万只。
不过，让人担忧个是，勿少商家推出啥个鲍鱼粽、鱼翅粽、干贝粽等等，一只要卖一百多，包装也邪气豪华，真个是搭月饼有得一拼了。前几日朋友送拨我一盒某名牌酒楼个豪华版粽子，加热以后剥开来，烂扑扑个勿成形，所谓叉烧、干贝、侪没应该有个味道，迭能个闲话，还勿如老老实实做好大肉粽算了。听讲，现在有眼饭店拿粽子外包出去，让弄堂里老太做，贴牌生产，质量监督又跟勿上，趁勒兴头浪向一下子推出来，抢钞票要紧啊！迭能个粽子勒价钿搭感情浪离百姓就越来越远了。搿几年，上海流行私房菜，葛末私房个月饼、八宝饭、汤团、年糕、粽子咾啥也就应运而生。我吃过个私房粽也蛮多，味道侪勿错，有辰光还会得出花样精，引入和牛、澳龙、金蚝、黑松露、牛肝菌、西班牙火腿等食材，真个是百花齐放，百家争鸣。舍得投入，勿计成本，竞争力也许就会增强。
有一位黄姐，退休勒屋里修养生息，每年端午前头会包点粽子拨朋友分享。伊个粽子有讲究，糯米是安徽吴祥个，肉是浙东农村散养个，粽箬从福建采购来，煠了以后仍旧碧绿生青。更加讲究个是五花肉切小块，事先用老抽腌两日两夜，再加糖拌透，一只粽子塞进五六块肉，足足有克，保证每口侪吃到肉，是肥瘦兼顾个肉，口感当然好咾！伊个粽子免费送朋友，大家吃了侪讲好，几番推让之后收了成本费。后来有勿少饭店听讲，问伊订货，伊忙勿过来，只好请邻居阿姨帮忙，屋里开小作坊了。饭店包粽子讲速度，据讲最快个一分钟要包十几只，伊关照阿姨：慢点慢点！一分钟只好包五六只，慢工出细活是有道理个。几年运作下来，黄姐成为上海滩有名个粽子大户。端午期间，一天产量突破只，一出锅就卖光！除脱本地客，还有专门从北京、广州来个吃客唻，连住勒古北小区个老外也来买伊个粽子，还有小日本乘飞机来买，当天就回转去。
还有位资深美女邢伟英，大家叫伊邢姐，十年前头勒苏州东山陆巷买了一幢明代“山中宰相”王鏊个故居会老堂，经过好几年修旧如旧，精心修缮，成为一家邪气有特色个民宿。阮仪山称伊是：“古建筑当中修复得非常好个一例。”每年端午节，邢姐要大张旗鼓个包趟粽子。淘米浸泡、清洗箬叶、五花肉上色调味等常规程序之外，伊还要老有仪式感个着件蓝印花布镶枣红色滚条个旗袍。包粽子个地方就勒会老堂个回廊下头，听听鸟鸣，感觉树影个移动，迭能个操作简直就是享受呀。粽子熟了就趁热送到亲朋好友屋里，我拿到以后一摸，还是热个！
旧年端午，邢姐包好粽子，突然之间想起来要为伊个粽子取个容易流传个名字。